ملتقى الألوان الفني ملتقى الألوان الفني
شوية محكي للشاعر مردوط الشامي “عابر سبيل”
——————–
شوية محكي
مخلوق من حبر وورقْ..
وسطور عمري…
بعرفا..
زاروب واصل عالغرقْ.
في ناس بيقولوا صبي ختيارْ..
ع الهامش مرقْ..
تاكي على عكاز شو بيشبه قلــمْ..
ع كل درب بيترك وجاع.. ونزقْ..
وفي ناس بيقولوا احترقْ..
من كتر ما حب الدني..
عم يكرها..
المسكين عا طيبة قلبْ..
مر النسيم.. ولاعبو..
وغفّــاهْ..ومن لمّـا وعي..
سكـّـر ع حالو دمعتو..
تا ما حدا يدرى بخيالو اللي انسرقْ..
للناس شو بيعطي فرحْ..
وينام عا سرير القلقْ…
شمسو الحزينة بتعرفو..
عابر سبيل..وما حدا متلو صَدقْ..
بيدوس عا شوك الدني..
ويترك لكل الناس وردات وحبقْ..
وقديش بيعيش الظلمْ..
وبينخدعْ..
بيقوم من قبل الشمس
يدقدق على بواب البشرْ..
ويبتسمْ..
حامل إلنْ..
قلبو .. وحياتو عا طبقْ..
مخلوق من حبر وشعرْ..
وبيشوف كل الكونْ..
حرفين وورقْ.
