ملتقى الألوان الفني ملتقى الألوان الفني
هـ الكان عندن بيت
وصورة
عليها ناس
معلّقين بخيط
وقعوا عن سطوح العمر
وسْتلَقِتّن الحجار
وِقْعوا
متل ما بيوقع المشمش
على ولاد الزغار
وين أهلي؟
وين طاحونة حزن خيي الزغير؟
وين طيارة ورق نومي
على هزّة سرير؟
وين الإيدين؟
الحطّت اْبريق الشتي فوق الحصير
وين شبابيك
الفات منها الصوت
متل الزمهرير
وين رمان السقف
مقطوف ومعلّق
متل عُمْر الكبير
لك.. عنّ يا قلبي
متل هـ النحل
جُوّات القفير
وقع العمر
ما بين إيد
وبين هزّات السرير.
شعر : طلال حيدر
تصوير : رلى بزي
